كي سيدي كي جوادو

سيدي سيدي، الشّباب عامل حالة ع الخدم
نحّي متاع الشّباب و الرّياضة
سيدي سيدي، الجزيرة في قطر عاملة فينا
نحّي متاع الأتّصالات متاعنا
سيدي سيدي، الأذان مقلّق برشة حاشية
نحّي عليّ متاع الشّؤون الدّينيّة
سيدي سيدي
أيّا اتنحّى من قدّام وجهي

Que c'est triste... Bouzid

هل أنّو الأنتحار حلّ؟
هل أنّو المنتحر محسوب من المدافعين عن قضيّة التّنمية؟ و لا من المجرمين اللّي نحميو منّو المجتمع
 مقيّد مع الشّهداء... شهداء الوطن؟ و لا يتسمّى عامل الحرام

توّ المنتحر الأوّل ظاهر مغلوب و نفهمو الغلبة و القهر اللّي يوصللهم الواحد بش يشعّل النّار في روحو... و اذا كان ساهم في تحريك العباد و فيّقهم على وضعهم بش يطالبو بشويّة عدالة في تقسيم الثّروات... الاّ انّو المنتحر الثّاني و لو انّو قتل روحو بعد ما عيّط ع الخْدِم، حسب ما قالت النّاس و اللّه أعلم، الاّ انّو نحسّو اكلّي بلبزها شويّة، ما نعرفوش على ظروفو كيفاش لكن اعتقد اللّي الأنتحار عمرو ما كان حلّ... هو هروب من الواقع اكثر من اي حاجة اخرى
صحيح اللّي الحالة الأولى يمكن اعتبارها بداية حلّ لمشاكل التّنمية في سيدي بوزيد خاصّة بعد ما سيّبو المعتقلين باشارة من الوالي... و
بتحضير برنامج للنّهوض بالمنطقة ب"لفتة كريمة" من سيادتو... لازم يحسّسوك باللّي عاملين عليك مزيّة... يخلّوك تحت الرّحمة... ظهرت معاملة الرّاعي بالمَعْـنَـيَيْـن الصّحيح و البلاغي... و كأنّو كلب ما تعطيه يتعشّى كان ما ينبح... حتّى يجيه نهار و يطلعلو الكلب ذيب جيعان

واللّي تغيظك اللّي العباد ولاّت تتصرّف وحدها بش تنشر المعلومة و لا تتحصّل عليها في جُرّة سياسة شمّ و غمّ متاع الأعلام في تونس... بعد اللّي حنّبعل تعدّي في احصائيّات القُبل و تعاسة ضبعة تعدّي في الكليبات و نسمة واحلة في كاس النّسمة و الخلاعة في حين البلاد تعيش في ثالث انتفاضة من اجل المعيشة في ظرف وجيز، الزّح تقول لا صار و لا كان... من غير ما نجبدو خنّار الجرايد... و حاسس ملّي بش يدوّروها اللّي حاولو ينتحرو مختلّين عقليّا و هاك الرّيق متاع استغلال الحادث لأحداث البلبلة في الأمن و الأمان

مشاكل النّاس في تونس معروفة... و أكبر مشكلة نواجهو فيها توّ هي فقدان الثّقة بالسّلط الثّلاث + سلطة الأعلام

تعدّى على واد هرهار و ما تتععدّاش على واد ساكت

لا يعجبكشي ضحك الأفام
الأنياب تحت الشّفايف
و لا يعجبكشي زين الكلام
   و الفعل مذموم نايف

التّونسي كي تسيّبو على طلق ذراعو

عندما يبلغ الفنّ ذروته... من قمّة الشّيخة ترنّ كرهبة كمال وشرن شرن يرنّ التّاليفون... عندما تصل العربيّة الى الأتحاف و الأطراب بالبلاغة و الفصاحة... نرتبط بعلاقة حُبّية مع المُلقي لأبداعاته... عندما نلامس الأخلاق الملائكيّة و نفتخر بالتّفتّح و التّحضّر... يُباح المحرّم و يحلّ محلّه الألتزام
عندما تحاول الجمع بين السّالف ذِكره... تأبى كلّ هذه القمم الاّ ان تجتمع في تونس
من آخر تقليعات الفنّ... من آخر صيحات الموضة الفنّيّة... تجود علينا قريحة زينة القصرينيّة بما يذبل الزّهور في الجنّة و ينبت الأورام في الأدمغة
قبل كنت نتسائل علاش بورقيبة كان يحط المزاوديّة في الحبس و يمنع الأصوات البشعة من البثّ في الأذاعة و التّلفزة...الرّاجل عندو الف حقّ... رجّعولنا الكوازي للحبوسات خلّي تُشجَــن الحيطان بما تنشده الحناجر القصديريّة، وشنيّة التّهمة، الأنحطاط بذوق الرّأي العام و النّزول به الى ادنى المستويات
أبقى لجان الرّقابة على النّصوص المسرحيّة و السّيناريوات السّينمائيّة - اللّي و ان بالغت في خدش "الحياء" لن تصل الى مفاحشة الآذان - موجودة و تخدم بمثاليّة، و التّلفزة مسيّبة الماء ع البطّيخ و حتّى نائب و لا مستشار ما جات لبالو فكرة الرّقابة على ما يبثّ و يشوّه في صورة تونس بالخارج... يا اخي كفانا

ملّس من طينك اذا ما يجي بُرمة يجي كسكاس

جاء سيادتو يعدّي في نهيّرين ياخي ندرا شنيّة وشوشولو روّح ينحّي و يعيّن... علاش يقلّك مهبولة و زغردولها في وذنها... ولا ظاهرلي فممّ فازا يحبّ يعملها قال خ نجرّبها في موريتانيا قبل
تي اش علينا احنا في حسابات الكبارات... اما اللّي محيّرني هو اشنوّة اللّي فمّ ياسر مهمّ في التّعديل الحكومي في موريتانيا و طاحو يكتبو في اسامي الجماعة... تي انا واحد م النّاس اوّل مرّة نقرى اسم الرّئيس و هو يسمّيلي بالتّفصيل (البو و ولدو) في الوزير و المنتدبين متاعو... و لا شكون و شكون اللّي يحكي بروحو و يتبّع و يقرى في تعديلات الحكومة في تونس

يحبّ يعبّي و يملّس فمّاش ما يحرّرلو حقّ آرتيكل... ملاّ "ميزيريا و فقر" في صحافتنا

كُــثرت المشايخ في البلد الشّايخ

تحت شعار اذا لم تستحِ فقل ماشئت... تقوم مستشارة تستفسر على صوت الأذان، من غير ما تنتقي الكلمات بدقّة بما انّو الموضوع حسّاس في بلد زعمة زعمة مسلم بش ما تخلّيش مجال للفهم المغلوط، وتطالب بش يتفقّدو الصّوت في النّورم ولا يتجاوز المسموح به و حول التّفاوت في الوقت بين الجوامع في المكان الواحد اللّي يشوّه صوت الدّعوة للصّلاة، و اذا كان يتجاوز النّورم او الحدّ الأقصى بش يولّي تلوّث لوجيكمون...يجاوبها وزير الشّؤون الدّينيّة جواب كلاسيكي اللّي كلّ شيئ  لاباس و 6 زيت
لحدّ هنا كلّ شيئ عادي، المشكلة في الرّياكسيون متاع العباد و اللّي بالطّبيعة تاقف في حدود الفايسبوك... تطلع التّصاور  و الفيديوات والنّاس لكلّ تولّي تقطّر بالأيمان و تحرّر في الستاتيات... و شقالّك شقال عليك... مرا عزوزة تحب تنحّي الأذان في تونس... هو طبيعي كلّ قرار تاخذو مجموعة يكون قرار متعصّب كيما قال ابن خَلدون... فما بالك بمجموعة من المشايخ كيما التّوانسة لكلّ... اما ع الأقلّ الواحد يعمل طرف هِمّة لروحو و ما يتبنّاش الفهم متاع غيرو و يعمل مجهود متاع دقيقتين و يحاول يفهم وحدو... على خاطر مش معقول الطّبيب يفهم كالعطّار كالمهندس كالقهواجي
صحيح كلّنا عنّا قيم وثوابت متربّيين عليها التّوانسة الكلّ براسك كيف كيف... لكن فمّ وعي و مستوى ثقافي يختلف و فيه درجات... و نورمالمون اللّي مستواه طالع يطلّع اللّي اقلّ منّو... مش يهبط حذاه يلعب الشكبّة

الشيء من مأتاه لا يستغرب

نلقى في جريدة الكترونيّة معروفة آرتيكل يحكي ع التّعليم في تونس حسب ترتيب بيسا تابع منّظمة أو سي دي اي اللّي فيها 34 دولة عضو و65 دولة داخلة في التّرتيب... و تونس من متصدّري مؤخّرة التّرتيب... من العشرة لخرانين
و الشّيء لا يستحقّ احصائيّات و لا مصروف زايد... المستوى ظاهر ياسر راقي كي تتعدّى قدّام المكتب تلقى الذّرّي تتعارك... على سيقارو مبشطر... أعطيني ميا... و خلّي و اسكت عاد على معـسول الكلام
و من الشّيرة الأخرى، تلقى المعلّم و لا البروف،تي من الأخر المربّي صوا ديزان... يربرب في القهاوي و يشرب في المنكر، يعطي النّوتات على قدّ... فلوس الأيتود
هذي حالات يوميّة  من غيــر ما نجبدو ع الحالات القصوى اللّي تتعدّى مجالس التّربية، تجيب على المركز بش توصل للمحاكم و القضايا... و فيها الضّرب و جبدان الموس اللّهمّ عافينا
تي لا علينا

انّما الامم الاخلاق ما بقيت فان هُمُ ذهبت اخلاقهم ذهبوا

ركّبوه ع البهيم مدّ يدّو للزّنبيل

شكون ما يعرفش الصّباح في تونس... مش اللّي يبدى مالعشرة و الحداش... دار الصّباح... جريدة الصّباح... نلقى في السّيت متاعها صونداج غريب ياسر... على الطّريقة الأمريكيّة ولا برّا لوّج منين جاتهم الفكرة الحولة يجي يطرح سؤال أخلاقيّا ما يجيش و انسانيّا عيب... و مهنيّا عمل غير محترف بش ما نقولوش صبياني فرد مرّة

تي كيفاش في جريدة ذات شهرة و انتشار واسع كما الصّباح تعدّي حاجة هكّة... الأستفتاء يعملوه بش يضغطو ع الرّأي العام لخدمة مصلحة معيّنة... و هنا شوفو هاكل المصلحة القويّة... سلب حقوق مدنيّة لمجموعة من المواطنين مازالو يبحثو في الجريمة متاعهم... و المتّهم بريء حتّى تثبت ادانتو... تجي الصّباح وتنصّب روحها المفتّش بحّوثة و السّلطة القضائيّة و تعطي الأختيار للأنترنوت بش يختار العقوبة اللّي تظهرلو مواتية حسب مزاجو وقتها
و يا حبّذا لو كان نعرف هل أنّو ع الأقلّ تعبوشي شويّة و قراو القانون الجنائي متاع تونس... انا ما نتصوّرش

بصراحة ياسر كثّرولها وسائل الاعلام في تونس... حاطّين رواحهم و بكل وقاحة في بلاصة النّاس الكلّ و فوق النّاس الكلّ

حِكاية تونسي

شكون فينا ما يحبّش يشدّ خدمة و ياخو شهريّة... شكون اللّي ما يحبّش كي يروّح يلقى روحو الرّابع في طاولة رامي و لا بولوط؟؟ و شكون اللّي ما يحبّش يلقى العشاء منصوب كي يدخل للدّار بعد اطراح الكارطة و الدّيمينو... يزيد يحلّ التّلفزة و يسهر ع الأنترنات... ويتفرّج في افلام وسيرييات للفجاري... وبرّا عاد سبحان من قوّمو الصّباح... كانو يقرى يصبح ما يخلطش و يعمل قهوة و كانو يخدم تنقبلو النّهار ولا رصّاتلو يشري في سرتفيكا... و كانك في الويكند انت والميزانيّة... يا امّا كعبات مع الأحباب و تلقاه يحلم بالخرجة من البلاد ال****... يا امّا سهريّة في كافيشانطة ولا بواطة و يقلّك بلادك بلادك و تونس يطيب فيها العيش وهات من هاك اللاّوي... هذا الكلّ  و يزيد يصبح نهار الأحد مع نصّ النّهار يقهوج ويمشي للسّتاد ويروّح يقلّك ايـــــــــــــه ما اثقل دمّو هالنّهار... اطول من بولة الصباح... و يتبّع الكورة و الأخبار و الميتيوو و لا يفوتو لا الطّاير ولا الرّاكز
الحاصيلو كان الرُّغبة كثرت عند العباد و التّشوكيع... يحب يصرف و مش من جيبو... يسهر و يقوم بكري... يخدم و يلعب

و الجمل هازز الحمل والقراد ينين

تونس بخير

نحوّس في أرتيكلوات قدم و نطيح بأرتيكل، اللّي يشوف العنوان يقول مشكلتنا في تونس في الصناعة والتّكنولوجيا في البنية القديمة متاع الوزارة... و هاو لقاو الحلّ... لوكال جديد... ما ناقص المخنوق كان ماكلة الحلوى... ما عادش عنّا تخلّف تكنولوجي... بش نولّيو نصدّرو فيها... و نتصدرو الطّليعة... هذ الكلّ و قالّك بش ينقّصو في الدّعم في الميزانيّة الجديدة... السّلعة تغلى و هوما يتقرنطو علينا... و م الشّيرة الأخرى ميزانيّة الدّاخليّة و الدّفاع زادت... آآآ مّالا... تكنولوجيا الرّادارات الأوتماتيكيّة غالية و تحبّلها مصروف بش "تتعممّ" كيما قال الوزير... بعد اللّي ولاّت صناعة مربحة... و قالّك بش يولّيو ينقصو من العقوبات البدنيّة و سلب الحقوق، معناها بلغة اخرى الحبوسات والأشغال، و يعوضوها بالعقوبات الماليّة

صناعة تمقيص العباد في الفلوس... صناعة مربحة ميا في الميا

يا لاهي بأحوال النّاس... أحوالك أكداس

كلّ غريبة و غريبتها، كان الجزيرة و صحافتها... تو بجاه ربّي ما عندهم كان تونس ينبّرو عليها... من ربع مليون وثيقة ما لقاو كان 4 منهم كهو و يحكيو على تونس... هو صحيح اللّي فيه طبّة ما تتخبّى... أما ماهو ع الأقلّ ما يعملوش كالجمل، ما يشوفوش حدبتهم
شبيهم ياخي هوما صابونهم نظيف... تي نورمالمون نلقاو عندهم أكبر عدد من الوثائق بعد العراق ما دام كانو مضيّفين أكبر قاعدة جويّة خارج أمريكا... عطاهم الوقت الكلب و يحكيو الموضوعيّة

لحاصيلو يا لاهي بأحوال النّاس... أحوالك أكداس

اذا لم تستحِ فقٌل ماشئت

معناها بكلّ صحّة رقعة ولا بكلّ صبيانيّة يجي رئيس الجمعيّة التّونسيّة للأنترنات و الملتيميديا في اذاعة اكسبر و يقول اللّي التصنصير راهو مش من تونس و مش م الآتي يي... يا خويا لعلّ عندو أنترنات أخرى يحوّس فيها كلّ يوم... و بالكشي في بالو اللّي قوقل بهلول ياسر يخلّي الصّفحات اللّي ما تخدمش يطلعو

Google offre la possibilité aux internautes d'indiquer les liens morts pour qu'il les élimine du résultat des rechaerches...

بصراحة ما تصوّرتش يجي نهار اللّي نوصلو فيه للدّرجة هذي من التبهليل و استغباء العباد... يا أخي كفانا... برّا دور بغافل... كثّرتو على ما وصّاوكم
 من قوّة الكذب الرّاجل لسانو تلَكوِن... جملة يعاودها تلاثة مرّات... عورتونا بصراحة

و اخيرا، الجواب الشّافي لجوليا بطرس

انا راكش قالق و نلوّج ما نعمل و نهبطلك على زنس عنوان متاع آرتيكل ياسر معبّر ويدغدغ قريحتي بش نكتب ها السّطرين

الآرتيكل مكتوب البارح، و كيما غدوة، 29 نوفبر، اليوم العالمي للتضامن مع الشعب الفلسطيني... شوف الصّدف يا سيدك
و هاو شنيّة صار اليوم

عريان **** في صبعو خاتم

كلّ آرتيكل لا بدّ عندو ال"ما بين السّطور متاعو" كان الآرتيكل هذا غلّب عليّ، الواحد تطيح بيه الدّنيا يولّي يفتخر بالتّفاهات... واللّي يلقى مدينة خالية... يقيم فيها الأذان

تحت شعار "سعدك يا فاعل الخير" شباب الصّين قاعد ما يعمل في شيء يلوّج وين يسهر... هو هكّاكة و تجيه "دعوة لتحمل المسؤولية" من هنا، من تونس، و انت تقول حشموشي ولا قالوشي نشالّه المرّة الجاية و لا خلّي نعملوها في فرح... بصحّة رقعة يعملو هكّ و يرحبو بالدّعوة ويزيدو يشكرو شكر عميق

آسف لم تنجح

تعليقا على آرتيكل قريتو في الصّباح عنوانو "دفاعا عن اللّغة العربيّة" متاع "الحبيب الأسود" اللّي ما عندي عليه حتّى فكرة... و رغم اللّي ما لقيتش حاجة كبيرة عليه في الأنترنات فهمت اللّي هو قومي عربي

لكن من غير خلفيّات كلامو لكلّ صحيح...الاّ انّو غفل  و لا تغافل على جزئيّة صغيرة... اللّي هي الزّمن

صحيح اللّغة العربيّة كانت تضرب تصرع... أما وقتلّي كانت للّغة أهميّة في الأديان و في البلاغة في الخطابات السّياسة، للذّكر خطاب الحجّاج ابن يوسف، و الشّعر و ما يصحبه من التّبهبير و التّشمشين العربي و البطولات من غير شهود

 أما توّ اللّغة المتداولة هي لغة العلم... و العلم تو عند الرّوامة... دُونْك من غير تفليم و كسوحيّة راس كما هما جا وقت و خذاو من عنّا... توّ اللّي صاير هو هجرة عكسيّة و قاعدين ناخذو من عندهم في الأيكس و الأيقراك و التّكنلوجيا رغم المحاولات الفاشلة لأيجاد ترجمة و تطلع في الأخر كلمة تضحّك... كما : الأبحار على الشّبكة العنكبوتيّة باستعمال الحاسوب

لول

ما يطيّح ع الرّطل كان الكيلو

زعمة يعملها توتو، قاهر قلوب العذارى و معذّبهم، و يطيّح على رزوقة؟؟

من الأبداعات التّي لا تحصى اخترت الفيديو هذي كَهَو و رغم قصر السّيكونس الاّانّها أبت الاّ  أن تحوي ما يكفي بش يرجع يقيّدوه في السّنة أولى

في كلمتين بش نوصف صاحب الطّلعة البهيّة... تناسق في الألوان تقول فرططّو ترنكوش... كالعادة ملطوخ ع الكرسي كِشكارة السّميد ... ينطق بعبارات فيها من البلاغة ما يكفي لأثارة غيرة المتنبّي... ابتسامة عريضة أخّاذة... تدارك مرتجل رشيق للمواقف المحرجة في المباشر

في كلمة وحدة... رجل أحلام كلّ فتاة، عفوا قناة تلفزيّة

حمص و زبيب

باعتراف من ها الشّيخ شلاكة... ما يعرفش علاش التّحريم و  التّحريم في حدّ ذاتو سبب كافي بش ما يخدّمش طاسة مخّو و يحاول يلقى تفسير... و مخّو ما خدّمو، و جابو ربّي في الصّواب، كان في تصنيف الأرنب و الفار كحشرة من الحشرات... ما يعرفش سيادتو اللّي القوارض من الثّدييّات كيفو كيفهم... و الحشرات ولاّت تعيش في الجحور... ايييه بابا يرحم من قرّى و ورّى

و ختامها مسك بالطّبيعة... الجراد من الطّيور

حلّ و لا مش حلّ؟؟

اللّيلة بش نحكي على آرتيكل في البيزنس نيوز قريتو الصّباح و خلاّلي غصّة على خاطر أوحالي بفيلم معروف

أوّل حاجة تلفت الأنتباه هي بالطّبيعة التّصويرة اللّي تعبّر ع الأفاريّات و المشاريع...ثاني حاجة هي الأسم  : يحكي على لذّة الأنتقام بأيحاء للياغرت دليس(تتليفة)... ثالث حاجة هي السّيرة الذّاتّية و البزنس و التذكير بالعمر
يحطّوه توّ في أحلى صورة، شباب لباس عليه ربّي يزيدو، يلعب بالمليردوات و سنقورفهمتني و لا لا... و برّا يا زمان و ايجا يا زمان تلقاه في أحلى كرسي

مثال للشّباب الحلّ و ليس المشكل

يا جماعة ناس بكري غلطو...تحجّ و لا تعوّق... كيف كيف

بالمناسبة و قبل ما نبدى نحبّ نشكر بندير مان ع التّسمية "تعاسة سبعة" تلميحا لقناة تونس سبعة
توّ بش نبدى على بركة اللّه و بتوفيق منه في الكتابة بيديّ الكريمتين... بش نعلّق ع الفيديو الأعجوبة و بالأحرى ع اللّي قاعد يقرى فيه خونا و هذا نصّو بالطّرف بالطّرف

"و من صعيد عرفة الطاهر، و في أفضل يوم طلعت فيه الشمس أو غربت، أفضل الأيام و أبركها..."
مقدّمة ياسر تعمل الكيف و تشهّي في الحجّ مش نرمال... تفكّرني في سنين الكولاج اللّي عدّيناهم نعملو في النّصوص الوصفيّة في الأنشاء.

"تعالت أصوات الحجيج التونسيين بالضراعة و الدعاء إلى العلي القدير"
الجملة و الكلمات مختارين توحي اللّي منتخب تونس للحجيج يعيّط بالتّوسّل والتّرجّي الى القدير

"كي يحفظ سيادة الرئيس زين العابدين بن علي و حرمه السيدة ليلى بن علي و كافة أفراد عائلته الكريمة"
بدون تعليق... مازلت صغير

"و يديم عليهم و على الشعب التونسي نعمة الصحة و السعادة"
جملة قصيرة و سامبل و كلاسيكيّة اما انا نقول هنا المربط الأوّل متاع الفرس... يا شعب راك عايش في صحّة وسعادة...و مازال الخير يدزّ... بحسب بعض المقالات في الصّحافة التّونسيّة نسبة مرض ضغط الدّم عنّا ياسر مرتفعة و بعض الأمراض المزمنة الأخرى... هاي نسب اخرى بش تعملو مقارنة

"و يزيد في توفيق سيادة الرئيس و تعزيز مقامه لمواصلة قيادة تونس و تحقيق المزيد من النماء و الخيرات على يديه الكريمتين، لما فيه تقدم تونس و مناعتها و عزتها."
وهذا ما نشكّوش فيه جملة... المربط لاخر... مازال يقود تونس بمشيئة القديراللّي طلبها منّو المنتخب


و كي نعملو حوصلة : منتخب تونس للحجيج يعيّط بالتّوسّل والتّرجّي الى القدير... بدون تعليق... مازلت صغير... هنا المربط الأوّل متاع الفرس... يا شعب راك عايش في صحّة وسعادة... و مازال الخير يدزّ... و هذا ما نشكّوش فيه جملة... المربط لاخر... مازال يقود تونس بمشيئة القديراللّي طلبها منّو المنتخب 

طامع في العسل من الفرززّو ولا عريان يسلب في ميّت؟؟

اللّيلة بش نحكي على فيديو نلقاها ع الفايسبوك
من اوّل مرّة تشوفها فمّ شكون بش يضحك و فمّ اللّي يتأسّف... الدّنيا أذواق... انا مانيش نلوم على حتّى واحد خاطر تحبّ ولا تكره النّاس الكلّ ضحيّة للآعلام... وما يفرق كان اللّي يعمل مجهود و يتبّع الحكاية اللّي تلقّاها من التّلفزة و لا الرّاديو و لا غيرو و يلقى اللّي وسيلة الأعلام غيّرت الحقيقة الى حدّ مّا
ظهرلي فهمتو اللّي بش نلوم على حنّبعل تيفي... مادام مانيش من احبّاء التّلفزة، فما بالك التّلفزة التّونسيّة، و ما نعرفش برامجهم دخلت نبربش (ولا نبحر) في السّيت متاعهم نلقى عندهم تبارك اللّه 3 برامج وثائقيّة مواضيعها ياسر تقدّميّة و ذات طابع علمي بحت، زوز يحكيو ع الحشيش و الحيوان ( مغامرات في البراري و لاخر روعة الخلق) والثّالث يحكي ع الحجر (معالم دينيّة)... وكوم بارازار مشيت نطلّ على صفحة الرّياضة نلقى قدّهم مرتين حاشى عينيكم 6 برامج تعنى بالرّياضة
الغباء هنا : كي انت عارف الشّعب لاهي كان بالكورة علاش ماشي تسأل فيه ع المناضلين اللّي أساميهم مش مذكورة حتّى في دروس التّاريخ البيداغوجيّة (معناها الحدّ الأدنى اللّي تطالب بيه الوزارة) ولا شكون مرّة شاف برنامج في التّلفزة يحكي عليهم... السّاعة انا ما نعرف كان مناضل واحد... ولا كي حنبّعل تستغرب جهل التّونسي في تاريخ مناضلي تونس الصّحاح ماهو ع الأقلّ تعمل برنامج عليهم حتّى مريرة في الشّهر يزّي... حبّيت نقوللهم : اكنس قدّام دارك قبل ما تعمل ريبورتاج هكّ

دونك ما يهمّش طامع في العسل من الفرززّو ولا عريان يسلب في ميّت... المهمّ فاقد الشّيء لا يعطيه

يا مزيّن م البرّا اشنية احوالك من الدّاخل؟؟

مستعملي الأنترنات في تونس الكلّ، براتيكمون، يعرفو اللّي الأنترنات توصلنّا طروف و فتارش، و لكلها تتعقرب، كلّ واحد على طريقتو، بش تبيح المحظور و تكشف ع المستور... السّؤال اللّي يفرش نفسو و يتمد... شكون الضحيّة في عمليّة اللّي يسرق يغلب اللّي يحاحي اللّي ولاّت ريفلاكس؟؟
الضحيّة مش عمّار اللّي داعيين عليه، تجري ما تلحق... قد ما يصنصر ما يخلطش... مادام مازال يخدم بقلب و رب و عن قريب يربح جائزة الموظّف المثالي
 و مش المستعمل  زادة مادامو تعلّم تقنيات جديدة كيما تبديل الأدراس بيبليك و البروكسي
انا نرى المتضرّر الوحيد هم اللّي يحرصو ع السّيت بش يولّي مطابق للأستعمالات اليوميّة للأنترنات... الحكاية تصير وقت اللّي نخدمو ببروكسي الكنّكسيون ترزن و تولّي ما يهمّش الصّفحة وقتاش تكمل... تبطى ولا لا... المهمّ تتحلّ... مش مهمّ فمّا برشة تصاور ولا  لا... برشة اشهار ولا لا... المهمّ تتحلّ.. الكاليتي متاع الفيديو و الصّوت ما تعني شيء قدّام انّو التّونسي يوصل يشوفها و يسمعها

خلاصتو : يا مزيّن م البرّا اشنية احوالك من الدّاخل

التّونسي : قاهر قواعد الابحار، العالميّة، على النّات

نكتب الّلّيلة ولا ما نكتبش؟؟

بعد حيرة و خطوة القدّام و عشرة سيّب عليّ قرّرنا، نحن، بش نكتب حويجة لا لشيء الاّ لمُجارات نسق في كلّ بيت كتاب و تحت شعار في كلّ ليلة ميساج، فهمتو اللّي الموضوع ما يهمّش اللّيلة... و ما دامني جبدت برنامج للأطفال كان يتعدّى في "تعاسة" سبعة (كيما قال الرّاجل) جبدنا مرّة في قعدة قهوة الميزيريا اللّي كانو يحطّو فيها للذّراري منها... للذِّكر و مش للحصر... الحكيم في ضيعة محروس بهيم و زيد يتربّجو بيه جحشان... ولا الأشهار "التّوعوي" على مرض الكزاز اللّي خلّى الصّغار الكلّ عايشة في كوابيس... الحاصيلو أعجوبة الجيل هذاكة  كيفاش سلِك منها وقاعد يقاوم في الأعراض
وتوّ اللّه و اعلم فاش يعدّيو تلقاه توّ لكلّ من انتاج كاكتوس 

نحلّ و لا ما نحلّش؟؟

نحلّ و لا ما نحلّش...نحلّ و لا ما نحلّش... زعمة نحلّ و لا فكّني... أيا برّا قلت خلّي نحل و وين ترصّي ترصّي غادي و ما تتحركيش... بنقة اخرى في التّسمية متاعو... ايّا قلت لواحد يبعد من المشاكل و يطرح أسئلة على خاطر الحلول عندها امّاليها و الحلّ بيد ربّي

في بلاد الدّوانة مع المدونين، انزاد مدوّن و فرحنا بيه

اللّهمّ أنصرنا على المُصَنْصِرين