3afsa

jeudi 23 décembre 2010

Que c'est triste... Bouzid

هل أنّو الأنتحار حلّ؟
هل أنّو المنتحر محسوب من المدافعين عن قضيّة التّنمية؟ و لا من المجرمين اللّي نحميو منّو المجتمع
 مقيّد مع الشّهداء... شهداء الوطن؟ و لا يتسمّى عامل الحرام

توّ المنتحر الأوّل ظاهر مغلوب و نفهمو الغلبة و القهر اللّي يوصللهم الواحد بش يشعّل النّار في روحو... و اذا كان ساهم في تحريك العباد و فيّقهم على وضعهم بش يطالبو بشويّة عدالة في تقسيم الثّروات... الاّ انّو المنتحر الثّاني و لو انّو قتل روحو بعد ما عيّط ع الخْدِم، حسب ما قالت النّاس و اللّه أعلم، الاّ انّو نحسّو اكلّي بلبزها شويّة، ما نعرفوش على ظروفو كيفاش لكن اعتقد اللّي الأنتحار عمرو ما كان حلّ... هو هروب من الواقع اكثر من اي حاجة اخرى
صحيح اللّي الحالة الأولى يمكن اعتبارها بداية حلّ لمشاكل التّنمية في سيدي بوزيد خاصّة بعد ما سيّبو المعتقلين باشارة من الوالي... و
بتحضير برنامج للنّهوض بالمنطقة ب"لفتة كريمة" من سيادتو... لازم يحسّسوك باللّي عاملين عليك مزيّة... يخلّوك تحت الرّحمة... ظهرت معاملة الرّاعي بالمَعْـنَـيَيْـن الصّحيح و البلاغي... و كأنّو كلب ما تعطيه يتعشّى كان ما ينبح... حتّى يجيه نهار و يطلعلو الكلب ذيب جيعان

واللّي تغيظك اللّي العباد ولاّت تتصرّف وحدها بش تنشر المعلومة و لا تتحصّل عليها في جُرّة سياسة شمّ و غمّ متاع الأعلام في تونس... بعد اللّي حنّبعل تعدّي في احصائيّات القُبل و تعاسة ضبعة تعدّي في الكليبات و نسمة واحلة في كاس النّسمة و الخلاعة في حين البلاد تعيش في ثالث انتفاضة من اجل المعيشة في ظرف وجيز، الزّح تقول لا صار و لا كان... من غير ما نجبدو خنّار الجرايد... و حاسس ملّي بش يدوّروها اللّي حاولو ينتحرو مختلّين عقليّا و هاك الرّيق متاع استغلال الحادث لأحداث البلبلة في الأمن و الأمان

مشاكل النّاس في تونس معروفة... و أكبر مشكلة نواجهو فيها توّ هي فقدان الثّقة بالسّلط الثّلاث + سلطة الأعلام

تعدّى على واد هرهار و ما تتععدّاش على واد ساكت

لا يعجبكشي ضحك الأفام
الأنياب تحت الشّفايف
و لا يعجبكشي زين الكلام
   و الفعل مذموم نايف

1 commentaire:

  1. Bonjour, je suis Arwa Kooli, étudiante en master SIC (sciences de l'information et de la communication) à l'IPSI. Mon master de recherche porte sur le journalisme citoyen. Je voudrais mener un entretien avec vous portant sur votre blog et les articles que vous publiez. J’espère que vous acceptez. Notez bien qu'il est extrêmement essentiel pour ma recherche. Merci !
    Mon e-mail est kooliarwa@hotmail.com
    Contactez moi s'il vous plait!

    RépondreSupprimer