من صبر غنم ومن تفكر علم

 الثّورة المضادّة مش تجمّعيين فقط، فمّا الأنتهازيّين القدم من اصحاب بن علي القدم قبل بروز الطرابلسية و فمّا الأنتهازيّين الجدد من رجال الأعمال. من اولويّاتهم ضرب رموز الثّورة و التّشكيك في صحّة مطالبها

ضرب الرّموز يتجسّد في اختلاق الرّوايات حول قصّة البوعزيزي بغضّ النّظر عن الحقيقة، يتجسّد كذلك في المماطلة في البتّ في قضايا الشّهداء  و التّنكيل بجرحى الثّورة و شفنا حالتهم المزرية و توفّى واحد منهم مؤخّرا نتيجة الأهمال و الفقر المدقع لعايلتو... و كأنّهم يعاقبون على أفعالهم الّي كان الدّنيا دنيا راهي الدّولة تتكفّل بعلاجهم.


التّشكيك في صحّة المطالب يتمثّل في التّقليل من اهميّة المجلس التأسيسي و التشكيك في نجاح المهمّة متاعو قبل حتّى ما ينتخبوه، التّلميح عبر الأعلام الرّسمي و الخاصّ بالمرور للمصالحة دون محاسبة... اعطاء صورة في الأعلام تشوّه صورة الثّورة بش تكرّه العباد فيها

و في الأخر المحاولات هذي نجحت عند العامّة ذوي التّفكير البسيط و جماعة أخطانا خلّينا شايخين و عند الفايقين و المتابعين ما تنجّم كان تزيد اصرار و عناد

مرحلة جديدة تقتضي أساليب جديدة

مازالو شهرين يفصلونا ع الشّرعيّة... شهرين مع حكومة انتقاليّة... في الشّهرين هاذم لازم نَعي أنّها مرحلة جديدة لسبب بسيط و انّو كي نرجعو للماضي القريب نلقاو الأحتجاجات مع بن عليّ و مع حكومات الغنّوشي المتعاقبة أفضت الى نتيجة و نجحت نسبيّا في ايصال الرّأي الّي تتجنّب الحكومة  مواجهته
أحنا توّ قدّام حكومة تعلّمت من أخطاء سابقاتها... و كلمة تعلّمت تشمل كذلك تطوير اساليب بش تتفادى بيها الأخطاء القديمة نذكر كأمثلة : تشويه صورة الثّورة و التّركيز على الجوانب السّلبيّة (تكثيف الأنتصاب الفوضوي و تشويه قضيّة البوعزيزي و المظاهرات و الأعتصامات السّلمية)، ضرب المواطن في شؤونه اليوميّة (الأضرابات، غلاء المعيشة و التّخويف من عدم خلاص الأجور) و نذكر ايضا ردّ الأعتبار للأجهزة الأمنيّة و حمايتها
هذه المرحلة و بما انّها جديدة فهي تقتضي وجوبا أساليب مقاومة أحدث، يزّيونا من القصبة و شارع بورقيبة و ساحة محمد علي... حتّى تبديل الشّعارات و الهتافات عندو أهميّة، أخطاونا من اسقاط النّظام و تبديل الوزير الأوّل، لا بدّ من اهداف مدروسة و منهجيّة تتلائم مع الوضع الآني و قابلة للتّغيير. للأسف نلاحظ الّي الثّورة المضادّة قاعدة في تطوّر و نموّ يغلب التّيّار الثّوري حيث النّاس فدّت من كلمة ثورة و من كلمة اضراب و نسبة التّقييد خير دليل

نقترح نبدّلوه

لا نحكي على لجنة لا على حكومة لا على رئيس... نحكي على لون... اللّون الأحمر متاع العلم. يرمز للدّماء، دماء الشّهداء اللّي ماتو على خاطر البلاد... ما عادش يؤدّي في المطلوب منّو توّ... المطلوب منّو أنّو الواحد كي يخزر للعلم الأحمر يتفكّر اللّي استشهدوا... مانيش نحكي على شهداء الأستقلال، اللّه يرحمهم بالطّبيعة، أما ع الأقلّ اللّي ماتو توّ توّ، البارح في الأيّام، 6 أشهر عندهم، اللّي طلّعو منهم زوز في القصرين يلقاوهم كيما دفنوهم

 و كي الواحد يتفكّرهم، ما فيها باس يعمل طلّة على ساحة حقوق الأنسان، و يشارك في شويّة احتجاجات، ياقف من أجل تطهير الأمن، تطهير القضاء، المطالبة بعدالة استثنائيّة في شأن المظاهرات و الأعتصامات، المطالبة بالسّعي من أجل المصالحة في عوض طمس الأنتهاكات (المجهود اللّي قام بيه ياسين العيّاري في ها الأتّجاه) ، الاّ اذا كان عندو اعتراض ع المطالب الكلّ

و بالمناسبة نقترح اللّون الأزرق أهوكا منّو البحر و احنا في موسم سياحة و منّو هانا ماشين بخطى ثابتة نحو التّطبيع و ربّي يجيبنا في الصّواب بما فيه خير الشّعبين من أبناء العمومة

#FreeFeriani

كيفاش تحبّو نقدّمو و نصلّحو البلاد اذا كان اللّي يتكلّم ع الخور يشدّوه و يعدّيوه على قضاء بن عليّ، و قوانين بورقيبة بتنقيح من بن عليّ... كان اللّي يتجرّأ و يعمل الخطوة الأولى يشدّوه و حتّى واحد ما يتكلّم و يدافع عليه، ما فمّا حتّى واحد آخر بش ينوي يعمل الخطوة الثّانية... الحاصيلو حاجة نحبّ نقولها المصالحة مع الأمن مش معناها تفريق الكادووات في الكياس يا تافهين

وأنتَ تُعِدُّ فطورك، فكِّر بغيركَ
لا تَنْسَ قوتَ الحمام
وأنتَ تخوضُ حروبكَ، فكِّر بغيركَ
لا تنس مَنْ يطلبون السلام
وأنتَ تسدد فاتورةَ الماء، فكِّر بغيركَ
مَنْ يرضَعُون الغمامٍ
وأنتَ تعودُ إلى البيت، بيتكَ، فكِّر بغيركَ
لا تنس شعب الخيامْ
وأنت تنام وتُحصي الكواكبَ، فكِّر بغيركَ
ثمّةَ مَنْ لم يجد حيّزاً للمنام
وأنت تحرّر نفسك بالاستعارات، فكِّر بغيركَ
مَنْ فقدوا حقَّهم في الكلام
وأنت تفكر بالآخرين البعيدين، فكِّر بنفسك
قُلْ: ليتني شمعةُ في الظلام

محمود درويش